Matreiðsla

Þráinn Freyr er alinn upp umvafinn matargerð og laðaðist að orkunni í eldhúsinu frá unga aldri. Hann fæddist á Sauðárkróki en flutti til Reykjavíkur til að læra matreiðslu og byrjaði ferilinn á Kaffi Óperu áður en flutti sig síðan yfir á Grillið á Hótel Sögu þar sem hann kláraði námið. Þráinn kom síðan við á Kolabrautinni í Hörpu og á veitingastað Bláa Lónsins áður en hann stofnaði sjálfur sinn fyrsta veitingastað. Í dag er hann eigandi veitingastaðanna Sümac, Óx og kokteilbarsins Ömmu Don.

Sümac er vinsæll veitingastaður sem sækir innblástur sinn frá Mið-Austurlöndum og Norður-Afríku þar sem mikil áhersla er lögð á krydd og framandi brögð. Óx byrjaði sem 11 sæta veitingastaður í bakherbergi inn af Sümac en er núna kominn í sitt eigið húsnæði þar sem sætunum hefur fjölgað í 16. Þar er lögð rík áhersla á íslenskt hráefni, nálægð við gesti er mikil og andrúmsloftið afslappað. Veitingastaðurinn Óx hlaut Michelin stjörnu árið 2022. Amma Don er kokteilabar sem skírður er í höfuðið á Ömmu Þráins frá Sauðárkróki.